SchmuDo 2025

We all Jahr sind miär Mythechroser Tätschmeischter für d`Verpflegig am Haarus gsii. Bi dä einte hed dä Tag ächli früähner gschtartet als bi dä andere.

Pünktlich am Morge am Nüni sind die erschtä Chroser iitrudlet. Bi liechtem Rägä hemmer dä letschti Feinschliff gmacht i dä Kaffischtubä, dä Bogäbar sowie au i dä Zächebar. Es isch fliessig ghämeret, iigrichtet, zämägmechet und installiert worde, bis de diä zweiti Hälfti vu dä aktive Chroser uf diä Zwölfi ufbotte worde isch.

Bevors los gange isch hend sich ä paari bereits äs Häxli oder ä Hülse gönnt und ganz gwundrig und bestunend dä Altchroser zuäglost, wo sie ufe Hauptplatz marschiert sind. Diä alt und diä ganz jung Generation, was für äs schöns Bild!

I dä Kaffischtubä isch de schnell eisch chli vollner worde. Es hend sich all chle wellä gu ufwärmä, ächli as trochnä gu höcklä und au dä Buuch mit öppis Warmem füllä.

Dank üsärä tollä Ablösig, äs riisä Dankäschön a üsi Hälfer, hemmer chönne am Zwei äs wahnsinnig tolls Erlebnis iisuugä. Miär sind mit dä Alt- und Jung Chroser i sechser bis achter Reihe ufe Hauptplatz iimarschiert. Was fürnes tolls Gfühl das gsii isch, ä Teil vunärä richtigä Musig Armee gsii zsii. Es hed äso Freud gmacht. Miär hend füüf Stückli mitenand musiziert, Angels, Abba, Roxi, Rosanna und zum chle wiägälä dä Schallmeier, ä wahri Freud.

Aaschliessend simmer is Pompello üsi Kehlä wieder chle gu öle. Ä diänigi Rundi isches gsii. Mit ärä churze Vorschtellrundi vu dä Altchroser, hemmer de alli genau gwüsst mit welnä dass mer d`Ehr gha hend ächi Musig z`machä. À paari hemmer scho a üsem Jubiläum im Januar gseh uf Sogar äs Gründigsmitglied und diä erscht wiiblich Präsidentin hemmer dörfä i derä gselligä Rundi begrüässä.

Churz vor dä Füfä hemmer üs wieder ufä wäg ad Arbet gmacht und üsi Hälferli chönne entlah. Der cheibä Rägä hed üs nid so vill durschtigi Schwyzer id d`Hütte brunge, jä nu.

Am Abig isches de numal so richtig luut worde ufem Hauptplatz under dä Chilä. S`Pingpongkonzert hed schtatt gfundä. Zämä mit dä Rampassä, dä Muotagnomä und dä Urmischlegel hemer abwechselnd vier Rundenä üsi Lieder zum Beschtä gä. Als chrönende Abschluss hemer mit em Medley dä Dorfplatz zum beebä brungä. Äs absoluts Highlight vu derä Fasnacht.

Und wiä chönndis andersch sii… nachem Uftritt id Möscht, i dem Fall es Tablar Kaffi Schnaps.

Miär hend ä tollä Tag dörfä erläbä. Nid z’letscht dank üsem Haarus OK und dä tatchräftigä Underschtützig vu üsne Hälfer, dä legendäre Altchroser und dä Junggeneration.

Äs riesä Dankä a üch und bis nächscht Jahr.

Bilder Hier!