Mythencenter & Gnomäball 2025

Gschetzti Dame, gschetzti Herre liebi Buure

Mir vo de Chroser sind ih Februar am 1erste vom Monet gstartet und wie! Mir hend üs am 13.30 vor em Mythecenter troffä, all hend gwüsst hütt staad es grosses Programm vor üs. Zerst hend mir üs klassisch über de Friitig Abig ustuscht. Diversi Gschichtli sind füre cho, vlt hed au eine warme Sache im Lift gmacht und hed ih Unterhose mūsse grettet wärde.

Es isch loos gang mir hend am 14.00 Uhr üse erste Uftritt gha und hend im Oktogon im Mythecenter gspillt. Viili gspannti Gsichter hend uf üs abegluegt und üs ahgfüüret. Es isch wiitergange mit enere Stärkig im Resti, so das mir parat gsi sind für üse 2ti Uftritt am 15.00 wider im Mythecenter, dasmal aber det vore, uf Dany’s Siite. Wider sind vill go lose und mir hend au det viär top Tänz gspilt.

De simmer mit Paar Strassestück durs Center gloffe. Wiitergange isches mit schminke und fötele. Alli hend ihres bestä gäh, hend d‘ Mahlchäste füre gnu und ihres Gsicht ahpinslet so dasmer gsed wie schön das mer cha usgse mit Schmunk. D Alessia hed de jede und jedi vo üs döffe fötele, mir hend nüi Föteli für üsi Hompage gmacht. Ihr chönd allso all gspannt sie und die Föteli gli go beguätachte. www.mythechroser.ch :).

De hemmer alles verrumet und sind wiiter richtig Ibach ah Gnomäball, imne Tempo wie de Bolt. Warum mir det appe gsecklet sind isch mir nu immer es Rätsel, will dunne hemmer nah gwartet vorem Ihgang. Es isch mir vor cho wie ih de RS Wuche 2, stresse das mer nah cha warte. Ah dere Stell nu eh Gruess ah üsne 2 Rekrute Diego und Valentin. Achtung! 

Bändeli hemmer übercho und mir hend de Usseuftritt gha. Rossanna und de Schächethaler hemmer gspilt. Tip tope Uftritt gsi. Alli hend ihri Instrument deponiert und sind go ahstah das mir üse Mage hend chönne fülle, 5 mal Pi heds geh.

De hemmer üs nu chli gstercht mit Getränk das mir de am 21.00 ready gsi sind für de grossi Uftritt im Zelt. Ih dere Ziit hend paar vo üs schnell Shotspieli gmacht und direkt gwunne, mit Abstand. Anderi sind sich ih de Portugisebeiz go stärke mit Sagres. De isches so wiit gsi mir hend de Uftritt gha, mit vill Lideschaft und Freud hemmer s Zelt mit bester Chrosermusig beglückt und üsem Geburichind de Lara es lächle uf Gsicht zauberet. Happy Birthday Lara.

Nachem Uftritt hemmer d Instrument versorgt und sind fest ih Trinklaune gsi. Es isch tanzet, gfiiret, plagiert, glachet und trunke worde de ganz Abig. S Portmanaire hed bi villne nid so Freud gha wo mir s erste mal die Priisliste gse hend, chönnt meine mir sigi z’Züri imne Club. Aber ja mer kennt üs und das hed üs halt au nid abghalte. s Einte oder andere Gschichtli isch nu passiert da gani aber jetzt nümme wiiter druf ih.

Ah dere Stell nu es grosses Danke ä super Abig mit vill Freud und Spass gsi.

Bilder Hier!