Chlämmerball 2025

Am Fritigabig sind Mythechroser ah ihre letschti Uswärtsuftriit für die Saison und zwar zude Cocorico uf Hühneberg. De Fritig nachem SchmuDo isch allig bekannt für die wunderschöne Schmünk mit elegante Schnäuz und geniale Augebraue, drum sind mier garantiert die schönste gsi a dem Fäscht.

Am halbi 8i simmer mitem Car ab uf Hühneberg und hend s’Fäschtgländ gad mal chli abcheckt. Bim Apero isch so s’erste Malheur passiert, de Alessia isch de Korke vode Aperofläsche voll a Grindel ane. Ups, aber sie hed zum Glück e stabile Chopf, drum hedsere nüüd gmacht.

Ide Halle inne sind mier scho fliessig vor de Bar am bstelle gsi. Bim Shotspieli sind gad mal 10 Shötli bstellt worde, will de hedme e kuhli Brülle übercho. Shötli sind da eventuell meh nebesächlich gsi, Hauptsach e lässigi nüi Sunnebrülle dasmer usgrüstet sind für am Mändig.

Ebefalls ide Halle hend sich zwei Chroser hinders DJ-Pult gschliche und hend die ganz Halle so richtig ihgheizt. Wo de 12i gsi isch, hend sich alli versammled, will mier hend öppis z’fiire gha. Man munkelt dass de Lükl entweder Muetter worde isch oder Geburtstag gha hed. Was gnau stimmt mönder selber usegfinde.

Natürlich hend sich paar ganz lustigi Chroser übere Abig paar Spässli erlaubt. Sig für d’Stromer nu lustig wennmer anere Glüehbirre chle umeschrubt bis es de zum Stromusfall chund unds de fiister wird. Wills so lustig gsi isch, hends das gad öppe 3x gmacht die Witzbolde.

Am 00.40 hend mier de üse Uftritt gha und natürlich wieder einisch meh brilliert. Mit M&F und em Abba-Medley hend mier ide Halle für voll Fäscht gsorgt und en super Uftritt anegleid. Nu es knapps Stündli nachem Uftritt hemmer numal döffe All-in bis denn de Car am 2:00 wieder retour richtig Schwyz gfahre isch. Au Carheifahrt isch wiedermal sehr amüsant gsi, s’Mikrofon isch hüfig zum Ihsatz cho mit paar guete Ussage und Witz hend mier bis zum Schluss e dienige Abig gha.

Bilder Hier!