Hammerball 2025

Ahschliessend ane stränge Arbetstag folgt en stränge Abig inklusive 02:00Uhr Uftritt am Hammerball z Hünenberg.

Damit mier au chle am Motto vom Fäst (What the Duck) entspräched hemmer paar Entene uf d Bagge gmaled und vier grossi Badeente debi gha. Nachere churze Fahrt hed mer s Areal besichtiget und denn au sofort d Kaffeestube in Beschlag gnu. Die erste sind de scho mit Souvenirs us de Valentintstagbar ufkrüzt.  X Kaffee und Häxe später hend sich Diversi ufgmacht zum Grill mit diverse kulinarische Leckerbisse z,B Kebapbox mit Chässauce.

Tanzet, g’chilbened und tunnälet (die Junge chönnd no mängs lerne vo de Alte) isch worde. Mer fragt sich de plötzli wer hed ahde Uhr dreiht und hed sich ihgfunde vorem Instrumenteahänger. Die einte hend sich ihgspielt mal schwiriger mal eifacher. Gwüssi sogar krassi Rap Solos am Sousi. Eminem lässt grüssen. Miteme mulmige Gfühl isch mer de uf d Bühni. Tönts wieder so we letzt Wuche? Isch scho z viel gsoffe worde? Schlafed die einte scho stehligs? Chönd all d Cherze? Sind die Ältiste alt und die Jüngste jung? Alles unbegründet! De Guggegott hed üs mäni nur für e Wuche Ferie verla. De Rapgott hed uf jedefall am Schluss vom Roxi no sis vorher ihgüebte Solo zum beste gä. Wenigstens hed d Tonlag gstumme

Under tosendem Publikum simmer us de Halle ih Car gflüchtet. Wie immer im Car heiss begehrt isch z mikrofon und eine am andere nah, sogar fremdi Gsichter, hend sich de müesse vorstelle und eine isch de gröber gsi als de ander. S isch um Schuggi, Schuehnummere und Arbet gange. Jede hed e schippe drufgleid bis d Lüüt uf de Sitz afe turne hend. Aber de hedmer auscho de lüchtig Zingel gseh und isch bim Proberuum zuechegfahre. Die meiste bis uf die letzte vier tapfere Musketier sind hei. Grüchtwiis siigeds etz no dunne. Schlussendlich bliibt eim vo dem Abig no d Vorfreud ufe Chlämmerball am gnau gliche Ort am Fasnachtfriitig.

Doch d Chroser sind wäge eim stränge Arbetstag und eim stränge Abig ned devo ab z bringe am nächste Tag tatchräftig d Muetter ihre Maa und dr Ander go ahzfüüre bim Priisnüssle. Heieiei.

All Chroser Gratuliered härzlich dene drü zu de Top Platzierige!!

Bilder Hier!