52. GV
Uf diä halbi 7i isch letscht Samschtig diä 52. GV vu de Mythechroser underem Motto „Schwiizer Promis“ gstartet. Au das Jahr hets wieder viel verschidnigi und kreativi Kostüm zbetrachte ghä. So zum Bispiel diversi Divertimento-Figure, dWätterschmöcker, de Suppe-Knorrli, au dFrau Iseli isch höch im Kurs gsi und sogar de Hausi Leutenegger, Hecht und dRusch-Büeblä hend üs beehrt. Nachere churze Asprach vum Martin Horat alias Daria Hicklin, wo au nu dDelegation vu de Güdelmändiger und dPassiv- und dEhemaligemitglieder begrüässt wordä sind, hets scho gli Znacht ghä. En feine Burger mit Pömmser hend miär döffä gniessä. Dankä vielmal as Circolo, isch super gsi!
Nachdem alli ufgässä hend, isch dGV-Präsentation gstartet. Begrüässt simmer usnahmswis mal vum Sicherheits-Mece wordä, wod dVertretig vu de Daria gmacht hed. Füre Jahresbricht hemmer denn sogar Bsuäch vum Samichlaus und em Schmutzli becho. Mer munklet, dass de eint oder ander chli nervös gsi isch, woner zum Samichlaus füre hed müässä. So sind während em Jahresbricht vieli lustigi Gschichtli vüre cho. Schad, dass dDaria de Gspass verpasst hed 😉
Nachere churze Pause isches de witergangä. De Kassebricht, Mutatione, Ehrige und diversi andere Sachä sind nu besproche wordä. A dere Stell dankä vielmal am Ivan, wo bereits sit 15 Jahr de Mythechroser treu isch. Am Silvan und de Marlene für ihri Arbet im Vorstand und de Emma und am Ramon wo die beide Ämtli wärdid übernäh.
Gspannt wenä Flitzebogä sind de natürlich au alli uf dVerkündigung vum bestä Kostüm gsi, wo de Hausi de Sieg hed döffä heiträgä. Mitere Dankesred isch diä Uszeichnig entgegegnu wordä. (Für all wo sich bis hüt fraged wer hinderem Hausi-Kostüm gesteckt hed: Es wär de übrigens de Ivan gsi).
Im Aschluss isch nu fliessig gsungä, tanzt und gredt wordä. Einigi nüi Ländlerformatione sind entstande und sogar s’Surfe ufme Kartonsurfbrett isch usprobiert wordä, mit meh oder weniger Erfolg.
Am 12i hed s’Circolo denn gschlossä. Für diä einte isches witer is Mill, für ander sogar is Urnerland ad Älplerchilbi. Witergfäschet isch uf jede Fall a beidne Ort wordä.
Schön isches gsi!
Fötäli gids hiä!
