Dorfbächler Chilbi 2026

Am Dunnstig hemmer voller Tatedrang afe ufstelle für d’Dorfbächler Chilbi. Trotz de Buustell hemmer
es passends Plätzli für d’Chroserbeiz, de Grill und d’Zächebar gfunde. S’Festareal isch hüür chli
kompakter gsii, hed aber au zunere gmüetliche Atmosphäre biitreid. Denn heds gheisse: Nur no
einisch schlafe und los gaahds! Zwei Täg Chilbi bi schönstem Wetter, mit vielne guet gluunte
Bsuecherinne und Bsuecher und gselliger Stimmig.
Am Friitig isch d’Chilbi mit de Fiirabigbier-Aktion iiglüüted worde und hed einigi Lüüt ahglockt, wo de
Summerabig im Dorfbach lah usklinge hend.
Am Grill isch flissig brutzled worde und zur Abchüehlig isch es chalts Bier oder es anders
Spassgetränk ufe Tisch cho. Verusse isches gmüetlich zue und häär gange zu de Kläng vo de
Ländlermusig, währendesse hed ide Chroserbeiz de DJ Felis iigheizt und dezue animiert s’Tanzbei
z‘schwinge. So isch de Abig wie im Flug vergange und hed für einigi früehner und anderi später
geendet…
Wie jedes Jahr hed am Samstig au wieder d’Chilbimesse im Josefschlösterli fest ufs Programm ghört.
Abem 11ii heds scho wieder vo wiitem nach feine Würscht, Schnitzelbrot und Pommes gschmöckt
und mier hend Messbsuecher und de Jodlerklub „Heimelig Schwyz“ döffe verchöstige. Nach de
Stärchig hend sie denn no paar Jüüz zum bestä gäh.
Ahschliessend hed üsi Chilbimeisterschaft gstarted mit de Diszipline Heisse Draht, Parcours, Büchse
rüehre und Armbrustschiesse. Trotz de warme Temperature hend Gross und Chli um Ruhm und Ehre
kämpft – de eintä isches besser glunge, anderne weniger. Jänu, Spass heds trotzdem allne gmacht!
D’Hüpfburg isch ebefalls höch im Kurs gsii und hed für viel Vergnüege bi de chlinste Bsuecher gsorgt.
Gäge Abig zue hend sich d’Tisch verusse langsam wieder afe fülle und es isch gjassed, plodered und
glached worde. Scho glii isch denn s’musikalische Highlight vom Wucheend cho: d‘Band Dirty Hotline
hed mit ihrne Rock-Cover begeistered und Hits us de 70er und 80er Jahr gspielt, wo d‘Zuehörer id
Vergangeheit zrugg versetzt hend. Nachdem isch ide Chroserbeiz und de Zächebar no usglasse
gfästed worde, bis de Morgä ahbroche isch…
Am Sunntig isch de ganzi Zauber scho wieder verbii gsii und mier hend de Dorfbach wieder uf
Vordermann bracht.
Mier lueged zrugg uf en schöni Dorfbächler Chilbi und danked am OK für die super Organisation trotz
dene erschwerte Bedingige, allne Bsuecher und Sponsore. Bis zur nächste Chilbi!

Hiä gids d’Fötäli!