Schmudo / Haarus

Wenns obe schifft und unne seicht, s’isch harglich dienig am Schmudo z Schwyz. Die
einte früehner und die andere später schlussendlich sind all zur ghörige Ziit am Ort
gsi. Erstunlicherwiis muemmer säge, die ghüft chalt Platte bim Gili dehei hätt zu
längerem verwile ihglade. Die gliche we immer sind de auscho de Grill go teste
underem Vorwand: «Ich ha Hunger» und sind dri gange. S’isch hässig gjasse und
pierro neroiert worde und so langsam hedmer sich ready gmacht füre namitags Uftritt
ufem Hauptplatz. Siehe da, während äbe dem Uftritt hed de Petrus sogar zwei drü
lüchtendi Strahle zu üs abegschickt. Tiptop gsi, die 2-3 Erfrüschigsgetränk hemmer
üs im Pompello verdienet. Hopp under s Dach. Westside ist the bestside.
Danke tuusig allne Hälfer wo üs das ermöglicht hend!!
Bevor mer retour sind, sind de einte schier d Auge useghid. D Mutti verusse am
Schmürze, nenei du! Wiiterhin isch Ponchowätter gsi, das leider auno am Pingpong
Konzert. Gwüssi hend sich no ich de Bar umetribe wos gheisse hed d Mythechroser
siiged wieder dra. S hend mäni noned all mitübercho gha, dass d Gnomä dasmal
ned debi sind. Bim Sprint ahs Konzert isch de au de Verlust vo paar Ponchos z
bechlage gsi. Aschliessend isch wie verruckt igheizt worde vode Ländlermuusig,
Mike und Co ih de Bogebar und em Star DJ Duo ihde Zächebar. S Fäst isch so guet
gsi dases gwüssi sogar d Stäge derab grüehrt hed. Viellicht isches au es
Streifschlägli gsi nachem 20. Mal Samba de Janeiro. Sambaaaaa!! Das ganze hed
soviel Spass gmacht, mer hed nedmal welle d Bar zuetue. Es paar pflichtbewusst
dütlich gwählti Wort vom OK hend de Star DJ’s de wieder klargmacht, dass die d Bar
ned elei zämeruume chönd. Drum hends de das unterfange widerwillig ufgäh. Isches
die falsch entscheidig gsi? Viellicht. Hend defür all gnueg Energie am Fritig gha?
Definitiv.
Schluss für Hüt de Chlämmerball am Fritig wartet

Fotos hier!