Güdelmändig

Am 04.45 hemmer üs ah dem Güdelmäntig z Rickebach obe troffe. Scho tip top gschminkt,
mit Pellerine und Rägejagge usgstattet trotzed mier dem grusige Wetter und sind parad zum
spielä. Pünktlich am 05.00 Uhr hemmer denn de Güdelmäntig midem Chlapf und em
ahschliessende Schwyzer eröffnet. Guete Morge Talkessel!
De Rhythmus hed hüt verstärchig vo de Carole becho, wo Posune gäge Pauke tuscht hed.
Geil wies machsch Carole! Und d Posune sind defür vo zwei Nachwuchs-Chroser begleitet
worde. Schön sinder debi gsi Carina und Nino.
Nach üsne erste Ständli gahts schnell wieder ih trochnig Schärme. Danke tuuusig, am Ivo
und em Cyrill für das super z’Morge!!! Mit Kaffe, Bier, Schwiinswürstli & Wienerli mit Brot
hemmer üs chönne füre Tag stärche. Au hed hie scho üses 1te Spieli vo de Guggeolympiade
uf üs gwartet. D Flurina hed 4 spannendi Spieli vorbereitet. Im erste hemmer innerhalb von
30 Sekunde alli 10 Post-it-Zetteli ohni Unterärm und Händ vom Körper müesse loswärde
– es sind uf jedefall die wildeste Moves scho so früe am Morge uspackt worde (und evtl. die
erste blaue Flecke vom Tag entstande). Guet hed s Garage-Tor ghebt.
Gli heds gheisse Instrument sattle und witer gahts. Im Räge hemmer üs denn ufe Weg
Richtig Hauptplatz gmacht wo üs Zwüschehalt im Ryser, Hirsche und Chrüz & Quer erwartet
hend. Üses Programm debi öppe eso: Gässle, Trööte, Riglä, Pellerine ah und abzieh, diversi
Chartespieli, Bier und Kaffe ih de Beize.
Im Chrüz & Quer hemmer denn au scho s 2te Spieli chönne ih Ahgriff neh. Mit gschlossne
Auge 10x im Chreis dreihe und denn is vormarkierte Viereck springe. Tönt doch ganz simpel
oder? Ja so eifach isches denn nid allne Chroser gfalle. Während sich die einte scho
bim dreihe fast us de Beiz verabschiedet hend, hed anderi s Glichgwicht bim Sprung is
Viereck verlah (hie sind uf jedefall witeri blaui Flecke gsammlet worde). Mier hend aber au es
paar sehr erfolgrichi Usfüehrige dörfe bestuhne!
Langsam chund de Hunger und mier möched üs imne chli trochnere Moment ufe Weg in
Acherhof wo üs s z’Mittag erwartet. Binere grosse Curry-Suppe sowie Ghakets & Hörndli hed
jede Chroser gnueg becho. Mit gfüllte Mäge heds den gheisse 14.30 Uftritt ufem Hauptplatz.
Tatsächlich hemmer chönne üsi Pellerine devor versorge. Motto füre Ufrtritt: gnüsseds, hend
Spass und chli lache. 🙂
S Wetter hed ghebt und erst nach üsem Uftritt hed de Räge sich wieder zeigt. Keis Problem,
ih de umliegende Beize oder de Bogebar hemmer üs chönne bi Bierli, Gemma usw. versorge
– oder wieder ih de Pellerine ihpackt de Rampassä ihre Uftritt lose.
Dennah simmer begleitet vo mal meh und mal weniger Räge wiitergässled und die nächste
Beize hend uf üs gwartet: Tübli & Mythenforum. Im Mythenforum isch denn s 3te Spieli
ahgseid gsi. En Schätzfrag: wie viel Büroklammere sind echt ih dem Gläsli? Ich weisses
tatsächlich bis jetzt no nid. Nebst dem sind am Nami auno Triangel-Talent entdeckt worde.
No nie öpper so begeistert gseh ah de Triangel wie d Anja!
Ziit vergaht wie im Flug und scho heds gheisse Ziit fürs z’Nacht. Ih de Hofmatt hemmer üs
füre letsti Teil vom Tag chönne stärche und üs im 4te Spieli mässe. Möglichst vieli Jasskarte
innerhalb von 45 Sekunde als Chartehus buue – vo 0 bis 13 Charte isch alles debi gsii.
Danke tuuusig Sandeero fürs Organisiere vo de super Verpflegig hüt! Schad hesch nid
chönne de ganz Tag debi sii…

Nachem z’Nacht heds denn no fürne Abstecher id Kellerbar glangt. Danke viel Mal ah üsi
Proberumchefs für die ersti Rundi us de Proberuum-Kasse für dShots!
Und scho isch de letsti Uftritt vo de Fasnachtssaison ahstande. Vorem Mytheforum hemmer
die letste Tön uspack, bevor d Flurina mid emotionale Wort s Fasnachtsjahr beendet hed.
Danke Flu für dis erste Majore-Jahr, du hesch das super gmacht!
Für einigi isches die letsti Fasnacht als aktive Chroser/in gsi. Danke üch viel Mal für üche
Ihsatz und die tolle Erlebnis! Es bsunders Danke gaht an Flo: mit so viel Herzbluet hesch du
während dine 15 Jahr soo viel für d Mythechroser gleistet. Ohni dich wäred mier nid de tolli
Huufe wo mier jetzt sind. Mier werded dich ih de Gugge sehr vermisse, aber freued üs mid
dier uf din neue Lebensabschnitt.
Nachdem Instrument versorgt gsi sind, simmer zum Abschluss no 1-2 go neh is Mill. Dette
isch denn auno d Guggeolympiade ufglöst worde. Gwunne hed Tamara – wo ihre Mill
Guetschin grad direkt in en Rundi Shötli für alli igsetzt hed, danke tuusig! De 2. Platz gaht an
Lükl und de Sigg und uf de 3. Platz hends d Michi und Jael gschafft.
Danke allne für die toll Fasnacht. Es war ein Fest!
Säge nurno: SAMBAA!

Hiä gids nu 1-2 Fötäli:)