Maskeball Illgau

Samstig, 24.01.2026 hend mier üs wieder einisch meh gschminkt und ready gmacht
für üsi nächsti Uftritt. Am 19:15 hend mier Treffpunkt gha in Illgau für ah Maskeball.
D’Freud isch riesig gsi und nu meh Freud hemmer gha, wos zNacht serviert worde
isch. Es hed ganz feini Burger mit Pommes gäh, mhhhh. Am 20:00 isch denn «One
Night Band» uftrette, wo für Stimmig gsorgt hed. Nach und nach hed sich die Halle
gfüllt und mier hend geniali Verchleidige döffe bestuune. Vo Gleitschirmflüger bis zu
Chüeh vode Vehusstellig Illgau heds also alles gäh. Am 21:00 hend mier de
Guggemusig d’LTB Sattel und Bogäspeuzer bi ihnem Uftritt ahgfüüred. Als nächsts
sind de au scho mier dra gsi. Mier hend ah üsem Uftritt döffe brilliere und hend es
super Publikum gha wo für Stimmig gsorgt hed. Nach üsem Uftritt hend mier für e
gueti Fäschtstimmig gsorgt. Im Partycheller unne isch Poscht abgange und mier
hend üsi Dancemoves uspackt. Limbo hed natürli au nid döffe fehle und es
Buzzergame hed diverse Mythechroser einigi Bazeli chostet. Komischerwiis sind ah
üsere Garderobe es paar orangi Mythechroser Hose ghanged. Wer da in Unterhösli
umenand gloffe isch, blibt öppe es Rätsel. Augezüüge döffed sich gern melde! Bis i
die früehe Morgestunde hend mier in Illgau gfiired. Einigi wo hend müesse schaffe
am nächste Tag, hends sogar länger usghaltet als einigi wo frii gha hend. Es isch uf
jede Fall e glungnige Abig gsi und mier hend es super Fäscht gha! Danke vill Mal
Maskeball Illgau!!!

Fötäli gids hiä!